[center]ازاى احبِّك يابلد وانتى مش حابّانى
ازاى احبك يابلد وانتي مش حبانى
إزاي أعيش وأموت وأندفن في أرض رفضاني
بنام وأحلم ببكرة ألاقي بكرة زود أحزاني
آه يا بلد لو بإيدي كنت أهدك وابنيكى من تانى
بيقولك تعديل دستوري إحنا عايزين تعديل إنساني
كل إنجازات البلد أنفاق وكباري
بلد بتموت وشعب فى حالة سكوت وكأنها لعبة اتاري
من كتر الظلم والظلمة بقول ياريت أيام الملك والانجليز ترجع تانى
آه يا بلد مليت بحبك الدفاتر مع العلم أنك قتلاني
مين اللي قال أن عبارة السلام غرقت
ومين اللي قال أن ممدوح إسماعيل قاتل وجاني
اللي غرقت مصر واللي غرق ما بيطلعش حي تاني
هو يطلع من صالة كبار الزوار وأنا اتحبس في سجن المطار واتعرض علي البحث الجنائي
انا اللي من صغري أخترتك سكتي أتريها سكة أحزاني
أنا اللي من صغري أخترتك كلمتي ألاقيكي مقيداني
آه يا بلد نفسي قبل ما أموت ألاقي زمانك وزماني
إتغربت أكتر من سبع سنين ورجعت لاقيت الغربة هنا شكل تاني
;
بلد بتعاني بكل المعاني بكياني وانا أملي أحس بكياني
عشرين سنة مخلص محبوس بين جدران دكاني
نفسي أعيش من غير ما أنافق السلطان والسلطاني
نفسي أعيش من غير ما أنافق ولا حتى أبويا اللي رباني
بكرة نتحاسبو على السكوت وعلي العيشة العمياني
إبني مكملش سنتين نايم جنب مني بيشد في شعري ويحط صباعه في وداني
ويضربني بالقلم ولسان حاله بيقول ليه يابا خلفت تاني
وأنا في سري بأقول ياريتك يا أحمد يابني ياباني إبن ياباني
مع إن وجودك في الدنيا عمل فيا وخلاني
أحب البلد أكتر وأهد جدران دكاني
شيخ الأزهر بيقول المعارضة حرام
وانا نفسى أعرف إيه الحلال فى بلد الميت مليون حرامي
أحمد فؤاد نجم
عن موقع الشاعر
موضوع: رائعة احمد فؤاد نجم الجديده 
الأربعاء سبتمبر 01, 2010 4:41 pm
الموقع